د روان کال د کرکټ نړیوالې شورا د پنځوس اوریز نړیوال جام لپاره کوربه هندوستان خپله ملي لوبډله اعلان کړه.
ټاکل شوې چې نړیوال جام د لسو هېوادونو ترمنځ په راتلونکي اکټوبر میاشت کې پیل شي.
د هند کرکټ بورډ نن په یوه اعلامیه کې د یاد نړیوال جام لپاره ۱۵ لوبغاړي اعلان کړي دي.
په اعلان شوې لوبډله کې روحیت شرما، کیل راهول، شبمن ګیل، ویرات کولي، شریس ایر، ایشان کیشان، هارډیک پانډیا، سوریا کومار یادو، رویندرجدیجا، اکشرپټیل، شاردول ټاکور، جسپریت بومرا، محمد شامي، محمدسراج او کولديپ یادو شامل دي.
سږ کال به هم په دې پنځوس اوریز نړیوال جام کې لس لوبډلې د لیګ سیستم په توګه سره سیالۍ وکړي چې افغانستان هم د دې نړیوال جام برخهوال دی.
دا په داسې حال کې ده چې هندۍ لوبډله اوسمهال په اسیا جام سیالیو کې بوخته ده او د سوپر فور پړاو ته یې لار موندلې ده.