طالبانو په کابل کې د ایران د نیمه دولتي تسنیم خبري اژانس عکاس او ویب لیکونکی نیولی دی.
دې خبري اژانس نن پر ټویتر لیکلي، محمد حسین ولایتي د شنبې په ورځ د کابل له هوايي ډګره نیول شوی دی.
د تسنیم خبري اژانس په خبره، ولایتي په قانوني ډول افغانستان ته تللی و او د نیول کېدو په اړه ورسره طالبانو هېڅ ډول جزییات نه دي شریک کړي.
تر اوسه طالبانو هم د ولایتي د نیول کېدو په اړه څه نه دي ویلي.
په افغانستان کې د طالبانو له خوا د یوه ایراني عکاس نیول په داسې حال کې دي چې همدا مهال د افغان اصله فرانسوي خبریالان مرتضي بهبودي په ګډون یو شمېر نور خبریالان له طالبانو سره په بند کې دي.