د ملګروملتو د بشري مرستو د همغږۍ اداره، اوچا وايي، کابو ۷۹ سلنه افغانان د څښاک، پخلي، او مینځلو لپاره کافي اوبه نه لري.
اوچا په یوه ټویټ کې ویلي، چې افغانستان په نړۍ کې د بشري بحران له یوه تر ټولو سخت وضعیت سره مخامخ دی.
د بېلابېلو بنسټونو د راپورونو له مخې، پر له پسې وچکالیو د افغانستان د اوبو پر سرچینو ناوړه اغېز کړی دی.
د افغانستان د یو شمېر سیمو بزګرانو ویلي، چې د وچکالۍ له امله یې خپلې سیمې پرېښي او نورو سیمو ته کډه شوي دي.
افغانستان د اقلیمي بدلونونو له تر ټولو زیانګالو هېوادونو هم یاد شوی.
د طالبانو د حکومت چارواکو له نړیوالې ټولنې غوښتي، چې په دې برخه کې خپلې وار د مخه ژمنه شوې پروژې دوی سره د سیاسي ستونزو له نظر کې نیولو پرته، ترسره کړي.