د طالبانو د حکومت عدلیې وزارت پرون چهارشنبې په افغانستان کې د سیاسي ګوندونو فعالیت منع اعلان کړ.
د طالبانو د حکومت د عدلیې سرپرست وزیر عبدالحکیم شرعي په کابل کې خبریالانو ته وویل چې ګوندونه شرعي اساس نه لري او فعالیت یې ګټه نه لري.
شرعي وویل، تجربې ثابته کړې چې د افغانستان روانې بدمرغۍ د سیاسي ګوندونو له کبله دي.
طالبانو دا بندیز په داسې حال کې اعلان کړ چې تراوسه پورې اساسي قانون نه لري او د حکومت د مشروعیت د مراجعو په اړه هېڅ راز وضاحت نه ورکوي.
طالبانو په تېرو دوو کلونو کې د نجونو او ښځو د تعلیم او کار په شمول له موسیقۍ رانیولې تر سینګارتونونو پورې پر ګڼو شیانو بندیزونه لګولي دي.