بریتانیا ته په لار د افغانانو او ځینو نورو هېوادونو د پناه غوښتونکو یوه بېړۍ ډوبه شوې چې پهکې لږ تر لږه ۶ افغانان مړه شوي.
پېښه د شنبې په ورځ شوې او د افغانانو مړي پرون راایستل شوي.
د سمندري چارو لپاره د فرانسې د دولت وزیر هاروي بیرویل د کالې په بندر کې خبریالانو ته د پېښې په اړه معلومات ورکړل او زیاته یې کړه چې قاچاقبران کډوال مرګ ته لېږي.
د بریتانیا او فرانسې ژغورونکو ټیمونو څه باندې شپېته کسان ژوندي ژغورلي چې اکثر پهکې افغانان دي.
په پاریس کې د افغانانو د یووالي ټولنې هم په خپله فېسبوکپاڼه د شپږو کسانو د مړینې د تایید تر څنګ ویلي چې د لږ تر لږه لسو کسانو د مرګ او ژوند په اړه لا معلومات نهشته.
سره له ده چې فرانسه او بریتانیا د کالې له لارې بریتانیا ته د پناه غوښتونکو د تګ مخه نیسي، خو اکثر افغانان او د نورو هېوادونو اوسېدونکي په قاچاقي بېړیو کې غواړي بریتانیا ته ورسېږي.