د پولنډ د دفاع وزیر ماریوس بلاشاک وایي، حکومت یې د بېلاروس پولې ته د لس زرو اضافي سرتېرو د لېږلو پر پلان کار کوي.
نوموړي نن ویلي چې د دې ګام هدف د پوله ساتو ځواکونو پیاوړتیا ده.
بلاشاک ویلي، دوی د بېلاروس پولې ته دغه سرتېري د دې لپاره لېږي څو یرغلګر وډار کړي چې د برید جرئت ونه کړي.
بېلاروس په سیمه کې د روسیې متحد دی او روسیه کې د واګنر جنګیالیو له بغاوت وروسته د دغې ډلې زرګونه جنګیالي بلاروس کې ځای په ځای شول.
بېلاروس کې د واګنر جنګیالیو ځای په ځای کېدو د پولنډ په ګډون د ناټو د نورو غړو اندېښنه پارولې ده.