د افغانستان د هوا پېژندنې د ملي ادارې له اټکل سره سم، نن په اتو ولایتونو کې د سختو ورښتونو او سیلابونو احتمال شته.
دا اداره وایي چې په نورستان، کونړ، لغمان، ننګرهار، پکتیا، خوست، پکتیکا او لوګر کې د درنو ورښتونو له امله د سېلونو د بهیدو اټکل شوی دی.
په وروستیو کې د افغانستان په شاوخوا څوارلس ولایتونو کې د سېلونو له امله شاوخوا پنځوس کسان مړه او سلګونه جریبه کرنیزه ځمکه او لسګونه کورونه ویجاړ شول.
د افغانستان د طبیعي پېښو زیاتیدل، چې له نړیوال اقلیمي بدلون څخه سرچینه اخلي؛ د دغه هېواد د بشري او اقتصادي ناورین د لا وضعیت خرابیدو وېره یې پيدا کړې ده.
د دغو پېښو له امله زیانمن شوي کسان شکایت لري، چې د طالبانو حکومت او نړیوالو مرستندویانو لازمې مرستې ورسره نه دي کړي.