په هند او افغانستان کې د هندي پوهنتونونو یو شمېر افغان محصلان د هند د وېزو له نه ورکولو له امله شکایت کوي.
دغه محصلان،چې د لیسانس او ماسټرۍ دورې یې بشپړې کړي وايي، د هند له حکومت څخه د تحصیلي بورسونو په تمه دي.
دوی وايي، د هند حکومت تېر کال د جولای تر میاشتې پورې سکالرشیپونه اعلان کړل، خو اوس په دې اړه معلومات نه لري ، چې ایا دوی به خپلو زده کړو ته دوام ورکړي او که نه؟
دغه محصلان وايي، که دوی ته بورسونه ور نه کړل شي، پوهنتونونو ته د داخلېدو نېټه یې پای ته رسېږي ، او نشي کولی چې خپلې وېزې هم تمدید کړي .
په هند کې د افغان محصلانو یو استازی میراحمد احمدي وايي چې دوی د هند د بهرنیو چارو وزارت او یو شمېر نورو اړوندو ادارو ته لیک استولی او له هغوی یې غوښتي چې په هند کې د افغان محصلانو ستونزې هوارې کړي.
نوموړي وویل:" موږ خپل غوښتنلیک ، پروپوزل ، ستونزې او اړتیاوې د شپږ سوه او څو محصلینو له لېست سره اړوندو ادارو ته ایمیل کړی او د بهرنیو چارو له وزارت سره مو هم موضوع شریکه کړې . "
سید محمود انوري چې د پونې پوهنتون د کمپیوټر ساینس له څانګې فارغ شوی، وايي چې غواړي د ماسټرۍ د زده کړو لپاره په هند کې سکالرشیپ ترلاسه کړي، خو سږ کال د آی سي سي آر سکالرشپ اعلان نه شو.
هغه وویل چې نه شي کولای افغانستان ته ستون شي.
انوري وایي:" کله چې جمهوریت سقوط شو، هند افغان محصلانو ته بورسې ورکړې ، سږکال هم موږ همدې ته په تمه یو ، خو تر اوسه یې هیڅ احوال ندی راکړی "
په هند کې یو شمېر نور افغان محصلان - ارشیف
په همدې حال کې د روانې اوونۍ د شنبې په ورځ د هند په چندیګر ښار کې یو شمېر افغان محصلانو د یوې غونډې په ترڅ کې د خپل برخلیک د معلومولو غوښتنه وکړه او د هند له حکومته یې وغوښتل چې دوی ته د زده کړو د دوام لپاره وېزې او سکالرشیپونه ورکړي.
د یوه هندي پوهنتون د وروستي سمستر محصل سید ساجد وايي، چې په افغانستان کې اوسېږي او باید د فراغت سند ترلاسه کولو لپاره د وروستي سمستر په ازموینه کې ګډون وکړي، خو د هند د ویزې د ترلاسه کولو هڅې یې ناکامې شوې.
ساجد زیاتوي:"امکانات یې نشته موږ د بهرینو چارو وزارت ته هم لاړو ، په ډیلې کې د افغانستان له سفارت سره هم په اړیکه کې شوو ، له پوهنتون څخه مو هم وغوښتل چې له موږ سره مرسته وکړي ، خو هغوی حاضر ندي چې راسره مرسته وکړي ، اوس مو یو سمسترپاتې دی ، نشم کولی چې خپل د فراغت سند واخلم."
يو بل افغان محصل چې نه يې غوښتل نوم يې په راپور کې واخيستل شي او سږ کال يې په هند کې د سوېلي اسيا سکالرشيپ تر لاسه کړی وايي، که د هند حکومت افغان محصلينو ته د وېزو ورکول پيل نه کړي، سکالرشيپ به ترې واخیستل شي .
دغه محصل وایي:" موږ په ټوله کې سږکال یو اویا محصلین سکالرشېپونوته بریالي شوي یو ، که تر ټاکلې مودې ونه رسیږو ، ډېر محصلین به سکالرشېپونه له لاسه ورکړي."
د هند حکومت په افغانستان کې د جمهوریت له ړنګیدو او د طالبانو له بیا واک ته رسیدو څخه وروسته افغانانو ته د ویزو ورکول بند کړل.
افغان محصلان چې په افغانستان کې ګېر پاتې دي ، په وینا یې له بیا- بیا غوښتنو وروسته هم په وېزو ترلاسه کولو نه دي توانېدلي.
په هندوستان کې د افغانستان د پرزول شوي جمهوري نظام سفارت او دغه راز د طالبانو حکومت څو ځله له هندي چارواکو افغان محصلانو او ناروغانو ته د وېزو ورکولو غوښتنه کړې، خو هندي چارواکو یې تر اوسه غوښتنې ته مثبت نه ځواب نه دی ورکړی.