د ملګرو ملتونو د کډوالو عالي کمېشنري یا 'یو این ایچ سي آر' وایي، د ۲۰۲۲ کال تر پایه په نړۍ کې د هغو افغانانو شمېر ۹.۲ ميلیونو ته رسېده چې کډوالۍ ته اړ کړای شوي دي.
دا د مخکېني ۲۰۲۱ کال په پرتله د افغان کډوالو په شمېر کې ۴۳ سلنه زیاتوالی دی.
تېر ۲۰۲۲ کال یوازې ۲.۶ ميلیونه افغانان ایران ته کډوال شوي دي.
د ملګرو ملتونو د کډوالو عالي کمېشنرۍ په هغه راپور کې چې پرون سې شنبې یې خپور کړی ویلي چې د دغو افغان کډوالو نیم ميلیونه یعنې تر ۹۲ سلنې پورې یې په اسیا کې اوسي.
د راپور له مخې ایران او پاکستان د څه باندې نوي سلنه افغان کډوالو کوربانه دي.
يو ان ایچ سي آر افغانستان د سیمې هغه هېواد یاد کړی چې هر کال ورڅخه تر ټولو زیات کسان کډوالۍ ته مخه کوي.