نن په هند کې د شانګهای د همکارۍ سازمان سرمشريزه جوړېږي.
د شانګهای د همکارۍ سازمان په نننۍ سرمشریزه کې به د افغانستان پر وضعیت هم خبرې وشي.
هند په شانګهای کې د دایمي غړیتوب له ترلاسه کولو وروسته د لومړي ځل لپاره د دغه سازمان د سرمشریزې کوربه دی.
د دې غونډې مشري د هند صدراعظم نریندرا مودي کوي او خپل پاکستاني سیال شهباز شریف ته یې هم د ګډون بلنه ورکړې ده.
د هند او پاکستان په ګډون د شانګهای د همکارۍ سازمان غړو هېوادونو د ۲۰۲۱ کال په اګست کې د طالبانو له واکمنۍ وروسته تل د افغانستان پر وضعیت اندېښنه ښودلې ده.
افغانستان چې د دغه سازمان څارونکی غړی دی، تل د شانګهای د همکارۍ سازمان د سرمشریزو او ناستو د اجنډا یوه مهمه برخه جوړوي.