د اوکراین د بېړنیو خدماتو اداره وايي، چې پر ختیځ کراماتورسک ښار د روسیې د راکټي برید د مړو شمېر اتو تنو ته لوړ شوی او ۵۶ نور یې ټپیان کړي دي.
د روسیې پوځ پرون د جون ۲۷مه پر دې ښار دوه توغندي وویشتل.
دا توغندي د ښار په مرکزي برخه کې پر هغه رسټورانټ ولګېدل چې ډېره ګڼه ګوڼه په کې وه.
د بېړنیو خدماتو ادارې پر خپله ټلګرام پاڼه په یوه بیان کې ویلي، چې درې مړي د نړېدلې ودانۍ له کنډوالو لاندې راایستل شوي او د نورو مړو او ټپیانو د موندنې لپاره عملیات روان دي.