د طالبانو له پېښو سره د مبارزې وزارت وايي، په پکتيکا، لوګر، پروان، ننګرهار او ميدان وردګو ولايتونو کې د سېلابونو د راوتلو له امله پنځه تنه مړه شوي او دوه نور ټپيان دي.
د دغه وزارت له خوا رسنیو ته پرون په لېږل شوې خبرپاڼه کې راغلي، چې د دغو سېلابونو په پايله کې د استوګنې يو شمېر کورونه ويجاړ شوي او د ځينو کرنيزو ځمکو حاصلات هم له منځه تللي دي.
خبرپاڼه زیاتوي، چې د دفاع وزارت د هوايي ځواکونو د هلو ځلو په پایله کې د ننګرهار ولایت په حصارک ولسوالۍ کې په سېلاب کې بند پاتې پنځه تنه د هیلیکوپټر په وسیله وژغورل شول.
د طالبانو له پېښو سره د مبارزې د وزارت په وینا، دا شمېرې لومړنۍ دي او د بدلون په حال کې دي.