ټاکل شوې چې ایران د چهارشنبې په ورځ له دوه نیم سوو ډېر نور افغان زندانیان په هرات ولایت کې د طالبانو حکومت ته وسپاري.
دا خبره په تهران کې د طالبانو تر کنټرول لاندې د افغانستان د سفارت شارژدافېر فضل محمد حقاني پرون ناوخته ازادي راډیو ته وکړه.
هغه تایید کړه چې پرون یکشنبه نژدې سل زندانیان افغان لوري ته وسپارل شول.
حقاني زیاته کړه: "د ایران حکومت تقریباً سل زنداني د نیمروز له لارې د افغانستان اسلامي امارت ته تسلیم کړل اودغه پروسه به دوام لري او انشاالله د چهارشنبې په ورځ به له دوه نیم سوو تر۲۶۰ پورې نور کسان هم په اسلام قلعه کې اسلام امارت ته تحویل شي."
تراوسه معلومه نه ده چې ایران کې څه شمېر افغانان زندانیان دي.
د طالبانو د حکومت بهرنیو چارو وزارت ویلي، د زندانیانو د انتقال لړۍ د دوی او ایران ترمنځ د شوې هوکړې له مخې پیل شوې ده.