د ملګرو ملتونو سرمنشي یو وار بیا په افغانستان کې د بشري مرستو د رسولو په چارو کې د ښځینه کارکوونکو رول مهم وباله.
انټونیو ګوټېرېش ویلي، په افغانستان کې میلیونونو کسانو ته د بشري مرستو لپاره له هغو ټولو اقداماتو تر شا کېدل کلیدي اهمیت لري چې د ښځو د کار حق اخلي.
ګوټېرېش پرون ناوخته په خپل ټویټر کې لیکلي چې افغانان سم د لاسه اضطراري مرستو ته اړتیا لري او د مرستو په رسولو کې ښځې مهم نقش لري.
وروسته له هغې چې طالبانو په غیردولتي موسسو او بیا د ملګرو ملتونو په ادارو کې د ښځو کار منع کړ، دې کار یې پراخ عکس العملونه وپارول.
ملګرو ملتونو ویلي چې اړو افغانانو په ځانګړي ډول ښځو ته د بشري مرستو په رسولو کې د دوی ښځینه کارکوونکې مهم نقش لري.
طالبانو لا هم نجونو ته تر شپږم ټولګي پورته د نور تعلیم اجازه نه ده ورکړې، په تېره ډسمبر میاشت کې یې د نجونو او ښځو د پوهنتون زده کړې هم منع اعلان کړې.