په داسې حال کې چې پرون (یکشنبې) په سوډان کې جګړه په پلازمېنې خرطوم کې د ولسمشرۍ د ماڼۍ په شمول د حساسو دولتي ودانیو شاوخوا ته وغځېده، بېلابېلو هېوادونو له خرطوم څخه د خپلو اتباعو ایستلو ته دوام ورکړ.
د رویټرز خبري اژانس د راپور له مخې، د مهمو دولتي ودانیو د نیولو پر سر د سختې جګړې له کبله د پلازمېنې ډېر اوسېدونکي بند پاتې دي، ځکه چې هوايي ډګر نافعال شوی او په واټونو کې خطر دی.
په سوډان کې د پوځ او د (ار ایس ایف) د ملېشه ځواک ترمنځ د قدرت پر سر جنګ ۹ ورځې پخوا پیل شو.
دا دوې ډلې، چې پخوا سره متحدې وې، په ۲۰۲۱ کې یې په ګډه د کودتا له لارې واک ترلاسه کړ.
امریکا او ګڼو نورو هېوادونو له خرطوم څخه خپل ډیپلوماتان ایستلي، خو لا هم سلګونه بهرنیان او ډیپلوماتان د لارو د بندېدو له کبله بند پاتې دي.