د ایران یوې محکمې دوه کسان په اکتوبر میاشت کې پر یوه زیارت د حملې په تور په مرګ محکوم کړل.
په شېراز کې په هغه حمله کې تر لسو ډېر کسان مړه شوي وو.
د ایران قضایه قوې پرون شنبه په خپل ویبسایټ میزان کې ویلي، دغه دوه کسان پر ځمکه د فساد په خپرولو او د ملي ګټو اخلاف د یاغي وسله والو په همکارۍ تورن شوي دي.
د فارس ولایت قاضي القضات کاظم موسوي ویلي، دغه کسان د خلکو په وسله وال کولو، اکمالات او د تروریستي حملې د عاملانو په لارښوونه کې په مستقیم ډول دخیل وو.
په اکتوبر میاشت کې پر شاه چراغ زیارت په حمله کې ۱۳ کسان مړه او ۳۰ نور ټپیان شوي وو.
په دې قضیه کې درېیو نورو شاملو کسانو ته د پنځو، پنځلسو او پنځه ویشتو کلونو بند سزا واورول شوه. دوی د داعش ډلې په غړیتوب تورن شوي دي.