ټاکل شوې د فنلنډ ولسمشر ساولي نینیستو Sauli Niinisto به بل سبا د جمعې په ورځ ترکیې ته لاړ شي او د دې هېواد له ولسمشر رجب طیپ اردوغان سره به په ناټو تړون کې د فنلنډ د غړیتوب د هڅې پر موضوع خبرې وکړې.
انقرې په دې وروستیو کې داسې نښې ښودلي چې، چمتو ده په دې تړون کې د فنلنډ د غړیتوب ملاتړ وکړي.
د فنلنډ د ولسمشرۍ دفتر وویل، نینیستو به په دې سفر کې چې د بهرنیو چارو وزیر پیکا هاویستو به هم ورسره ملګرتیا کوي، په ترکیه کې د فبرورۍ د میاشتې ویجاوړونکې زلزلې وروسته د بیارغونې د هڅو او په ناټو کې د فنلنډ او سویډن د غړیتوب پر موضوعاتو خبرې وکړي.
فنلنډ او سویډن پر اوکراین د روسیې د یرغل له امله په تېره می میاشت کې د لسیزو ناپیلتوب ته شا کړه او د لوېدیځ په دغه تړون کې یې د غړیتوب رسمي غوښتنلیکونه وړاندې کړل.
ترکیه او هنګري د ناټو هغه دوه غړي هېوادونه دي چې، تر اوسه یې په دغه تړون کې د دغو سکاونډیناوي هېوادونو د غړیتوب غوښتنلیکونه نهدي تصویب کړي.