د ملګرو ملتونو د خوړو نړیوال پروګرام وايي، تېر کال یې په افغانستان کې له هغو ۲۳ ملیون کسانو سره مرسته کړې، چې د خوړو له کموالي سره مخامخ وو.
دغې ادارې پرون په یوه ټویټ کې ویلي، په دې ډله کې ۱۲ ملیونه ښځې او نجونې هم شاملې دي.
د خوړو نړیوال پروګرام په څو ټویټونو کې د ګڼو هېوادونو او سازمانونو مننه کړې، چې د دوی په څېر د سخاوتمندو شریکانو له برکته دوی دا مرسته کړې ده.
پر افغانستان د طالبانو د ولکې له بیاټینګولو وروسته اقتصادي رکود او بشري مرستو ته د اړو کسانو شمېر زیات شوی دی.