د افغانستان او بنګله دېش نولس کلنو لوبډلو ترمنځ لومړۍ نړیواله یو ورځنۍ لوبه د افغان لوبډلې په بري پای ته ورسېده.
دغه سیالي افغانستان په ۱۵۸ منډو وګټله.
د دوشنبې په ورځ د مارچ په ۱۳مه نېټه د کابل پر وخت سهار ۹:۳۰ بجې دغه سیالۍ د عربي متحده اماراتو په ابوظبۍ ښار کې پيل شوه چې افغان لوبډلې لومړی توپوهنه ترسره کړه.
افغانستان په ټاکلو ۵۰ اورونو کې د ۲۷۲ منډو هدف وټاکه.
دوی ته سهیل خان پوره ۱۰۰ منډې وکړې. دغه راز سلیمان عربزي ۵۵، محمد هارون ۴۳ او اکرم محمدي ۲۸ منډې جوړې کړې.
د بنګال په توپ اچونکو کې بیا معروف او واسع صدیقي دوه ـ دوه لوبغاړي وسوځول.
بنګله دېش د ټولو لوبغاړو په سوځېدو سره ۱۱۳ منډې وکړې او د ۱۵۸ منډو په توپیر یې ماتې وخوړه.
د دوی مخکښ توپ وهونکی جیشان عالم و چې ۲۷ منډې یې وکړې.
د افغانستان چټک توپ اچونکي یما عرب ۴، فریدون داودزي ۳، ناصر حسن ۲ او کامران هوتګ یوه وېکټ واخیسته.
دغه سیالۍ چې د افغانستان په کوربتوب ترسره کېږي، دویمه لوبه به یې د مارچ په ۱۵مه نېټه ترسره شي.
د دې سیالۍ غوره لوبغاړی سهیل خان و.
د ویلو ده چې تر دې سیاليو وروسته به د افغانستان په کوربتوب د بنګله دېش او سریلانکا هېوادونو ترمنځ د مارچ په ۱۸مه نېټه درې اړخیزې یو ورځنۍ سیالۍ هم پیل شي، چې د همدې میاشتې تر ۳۰مې نېټې به دوام وکړي.