د یو شمېر راپورونو له مخې د تېرې یوې اونۍ په ترڅ کې ایران نهه سوه افغان زندانیان افغانستان ته سپارلي دي.
د طالبانو د بهرنیو چارو د وزارت مرستیال ویاند حافظ ضیا احمد تکل رسنیو ته ویلي چې تمه ده نور افغان زندانیان به هم له ایرانه افغانستان ته انتقال شي.
د تېرې یوې اونۍ په ترڅ کې وروستۍ ډله زندانیان د پنجشنبې په ورځ اسلام کلا بندر ته ورسېدل چې شمېر یې یوسل او یو اتیا تنه و.
پر افغانستان د طالبانو له دویم ځلي واکمنۍ راوروسته ګڼ افغانان ایران ته په غیرقانوني لارو کډوال شول چې یو شمېر یې د اسنادو د نه لرلو په تور زنداني شوي دي.