د ملګرو ملتونو د بشري حقونو لوی کمېشنر وايي، په اوکراین کې روانه جګړه د ټکان ورکوونکې مرګژوبلې او زیانونو سبب شوې ده.
ولکر تُرک پرون سهشنبه په ژنیف کې د ملګرو ملتونو د بشري حقونو شورا ته په وینا کې وویل: "په اوکران کې جګړه د ملکي مرګژوبلې او د ټکان ورکوونکو ویجاړیو سبب شوې. د اوکراینیانو او د راتلونکو نسلونو حقوق به زیانمن شي، د سون او خوراکي توکو پر بیو او د هر هېواد پر جیوپولټیک کړکېچونو یې منفي اغېز کړی دی. دا ډول زیان کولی شي په اروپا کې د جګړې له لارې یو وار بیا ټولې نړۍ ته خپور شي."
په همدې حال کې د روغتیا نړیوال سازمان یوه لوړ پوړي چارواکي وویل، چې په اوکراین کې د روانې جګړې له کبله په زرګونو کسان سخت زیانمن شوي او روغتیايي خدماتو ته اړتیا لري.
دا ډول زیان کولی شي په اروپا کې د جګړې له لارې یو وار بیا ټولې نړۍ ته خپور شي."
د رویټرز خبري اژانس د راپور له مخې په اروپا کې د دې سازمان د سیمهییز دفتر غړي ډاکټر ساتیش مشرا په یوه کنفرانس کې وویل، د روغتیايي څارنې پر مرکزونو حملې، د طبي تجهیزاتو کموالی، د خلکو بېځایه کېدل او د برښنا پرچاوي د دې سبب شوې چې د اوکراین ګڼ وګړي له وړ روغتیايي خدماتو بې برخې شي.
دغه راز د ملګرو ملتونو سرمنشي انتونیو ګوتېرش نن په پلازمېنه کییف کې له ولسمشر ولودمیر زلنسکي سره روسیې ته د اوکراین د غله جاتو د صادراتو پر موافقه خبرې کوي.
د ملګرو ملتونو په منځګړیتوب دغه موافقه دېته زمینه برابروي، چې د اوکراین غله جات د تور سمندرګي له لارې نورو ځایونو ته صادر شي.
د ملګرو ملتونو سرمنشي انتونيو ګوتېرش
پر اوکراین د روسیې د غیرموجه یرغل څه باندې یو کال کېږي، چې له کبله یې د مسکو او د اروپايي ټولنې د غړو هېوادونو ترمنځ اړیکې ترینګلې شوې دي.
د رویټرز خبري اژانس د راپور لهمخې، د پولنډ دفاع وزیر ماریوش بلاشاک پرون وویل، چې هېواد یې غواړي د لیوپاردـ۲ په نوم لس ټانکونه چې په جرمني کې جوړ شوي، اوکراین ته ولېږي.
بلاشاک په یوه کنفرانس کې وویل، دا مهال اوکراین ته د لیوپارډـ۲ ټانکونو څلور عرادې لېږل شوي او لس نور ټانکونه به راروانه اوونۍ اوکراین ته ولېږل شي.
د اروپايي ټولنې د دفاع وزیرانو په خپله وروستۍ غونډه کې چې د سویډن په پلازمېنه ستاکهولم کې وشوه، د اروپا پر امنیت او د اوکراین پر ملاتړ خبرې وکړې.
په هغه غونډه کې پولنډ ژمنه کړې وه، چې په ټوله کې به د لیوپاردـ۲ ټانکونو ۱۴ عرادې اوکراین ته ورکړي.