د اوکراین پوځ وايي، د روسیې له خوا د اوربند له اعلان سره سره، پرون د جنورۍ ۶مه د جنوبي ښار خرسون په ګډون په بېلابېلو جبهو کې نښتې روانې وې.
په خرسون کې د اوکراین د پوځ قوماندان یاروسلاو یانوشیویچ وايي، د دغه ښار د اور وژنې څانګه د راکټي بریدونو له امله په نښه شوې چې په پایله کې یې یو کس وژل شوی او څلور نور ټپیان شوي دي.
د روسیې ولسمشر ولادیمیر پوتین یوه ورځ مخکې ویلي وو چې اوربند به د اورتودوکس کرسمس په مناسبت د جنورۍ د شپږمې له سهار د جنورۍ د اوومۍ د شپې تر نیمايي دوام وکړي.
خو د اوکراین ولسمشر ولودومیر زیلینسکي له یو شمېر لوېدیځو چارواکو سره په ګډه روسیه تورنه کړه چې د اوربند له نوم څخه په استفادې د خپل جنګي موقف د پیاوړي کولو هڅه کوي.