د اوکراین ولسمشر ولودمیر زلنسکي خپلو خلکو ته د روسیې لهخوا د نورو حملو خبرداری ورکړی دی.
زلنسکي پرون ماښام ولس ته په خپله ورځنۍ ویډیویي وینا کې ویلي، روسي پوځیان به د ۲۰۲۲ کال په پاتې څو ورځو کې نور بریدونه هم وکړي.
نوموړي زیاته کړې: "دښمن هڅه کوي چې دغه ورځې نورې هم پرې تیاره او سختې کړي."
د اوکراین ولسمشر زیاته کړې، روسیې ۲۰۲۲ کال کې هر څه له لاسه ورکړي، خو په خبره یې مسکو غواړي دغه زیانونه د تبلیغاتو له لارې بېرته جبران کړي.
روسیې په دې وروستیو کې د اوکراین پر بېلابېلو سیمو توغندیز او هوایي بریدونه ډېر کړي دي.