د ایران په اوین زندان کې یو شمېر سیاسي ښځینه زندانیانو د یوه لیک په ترڅ کې خپله اندېښنه د وروستیو اعتراضونو په ترڅ کې د نیول شویو کسانو د اعدام د حکم په اړه څرګنده کړې ده.
دا ښځې چې شمېر یې اتلسو ته رسیږي په دې لیک کې له خلکو غوښتې دي چې دوی هم د اعدامونو او د اعتراض کوونکو د نیولو په تړاو خپل مخالفت وښیي.
دې ښځو د محسن شکاري اعدام ښکاره جنایت بللی دی.
درویشت کلن محسن شکاري د امنیتي ځواکونو د یوه تن د ټپي کېدو په تور د پنجشنبې په ورځ اعدام شو.
ایران د دوشنبې په ورځ یو بل معترض مجید رضا رهنورد د دوو امنیتي سرتیرو د وژلو په تور اعدام کړ.
پر دې اعدامونو د بشري حقونو نړیوالو بنسټونو او لوېدیځو هېوادونو پراخ غبرګونونه څرګند کړې دي.