د امریکا د بهرنیو چارو وزارت په افغانستان کې د طالبانو له لوري د ازادي او امریکا غږ راډیوګانو د خپرونو پر بندیز غبرګون ښودلی دی.
د امریکا د بهرنیو چارو وزارت وايي، د ازادي راډيو او امریکا غږ په نشراتو د طالبانو لخوا بندیز دا وښوده چې دوی به خپلو ظالمانه پرېکړو ته دوام ورکړي.
د دې وزارت ویاند نېډپرایس په خپل تویټر پاڼه لیکلي چې امریکا اطلاعاتو ته د لاسرسي په برخه کې له رسنیو په پراخه کچه خپل ملاتړ ته دوام ورکوي.
د افغانستان د سولې لپاره د امریکا ځانګړي استازي توماست ویسټ هم د طالبانو دغه اقدام غندلی دی.
نوموړي د جمعې په ورځ په خپل ټویټر ولیکل، افغانان حق لري چې خبرونو او راپورونو ته پرته له کوم توپیري چلند لاسرسی ولري.
په ورته وخت کې د بې پولې خبریالانو ټولنه "RSF" د طالبانو له حکومت نه غوښتي چې ژر تر ژره دې خپله دغه پرېکړه بېرته واخلي او د رسنیو ځپل او دغه شان د خبریالانو خپلسرې نیول دې ودروي.
د بې پولې خبریالانو په یوه اعلامیه کې چې د دغه بنسټ په رسمي ویب سایټ خپره شوې راغلي د طالبانو سخت اقدامات د دې لامل شوي چې ځینې رسنۍ خودسانسورۍ او یا هم د خپلو فعالیتونو بندولو ته مجبوره شي.
ازادي راډیو تل د افغانانو د اواز اوچتولو او خپرونو رسنۍ وه او وي به.
د دې ټولنې په خبره، هغه رسنۍ چې د افغانستان نه بهر د افغانستان لپاره نشرات کوي په اوسنيو شرایطو کې موجودیت یې ډېر مهم دی.
په همدې حال کې د پژواک خبري اژانس مشر دانش کړوخېل د ازادي راډیو او امریکا غږ په وړاندې د طالبانو دغه کړنه د بیان ازادي ته د دوی نه ژمنیتا ښيي.
نوموړي ازادي راډیو ته وویل: "موږ باید خلکو ته دا په واک کې ورکړو چې هر ډول معلوماتو ته لاسرسی ولري، اوسني محدویتونه حاکم نظام د خلک په وړاندې بې باوره کوي. د دې لپاره چې په اوسنۍ نړۍ کې هغه معلومات چې سانسور شي او له فلتر نه ووځي خلک پرې باور نه کوي، د همدې له امله خلک په حاکم نظام بې باوره کېږي."
په افغانستان کې د ازادو ژورنالېستانو ټولنې هم دیوې خبرپاڼې په خپرولو سره ویلي چې د ازادي او امریکا غږ راډیوګانو په افغانستان کې ځانګړي مینه وال درلودل او د نشراتو له بندولو سره یې خلک له تعیلمي خپرونو او په ټوله کې اطلاعاتو ته یې لاسرسی سختېږي چې دغه چاره له افغانستان نه نړۍ ته د بیان ازادۍ یو بد انځور وړاندې کوي.
د طالبانو له لوري د ازادي او امریکا غږ راډیوګانو د نشراتو بندولو ته ورځ تر بلې غبرګونونه په زیاتېدو دي.
د طالبانو حکومت د اطلاعاتو او فرهنګ وزارت د افغانستان په ۱۳ ولایتونو کې د ازادې اروپا / ازادي راډیو نشرات بند کړل.
د دې وزارت د نشراتو د څار برخې رییس عبدالحق حماد د ازادي راډیو د نشراتو د بندولو لامل د ده په وینا د بې پريتوب او د خبریالۍ اصولو نه مراعتول ښودلی و.
په پراګ کې د ازادې اروپا/ازادي راډیو مرکزي دفتر یوه څنډه
خو د ازادې اورپا/ ازادي راډیو اجرایوي مسوول او رییس جیمي فلای بیا وايي چې ازادي په افغانستان کې لسګونه میلیونه افغانانو ته د شاه رګ حیثت لري او د طالبانو دغه پرېکړه به دوی ډېر خفه کړي.
د ازادې اروپا/ ازادي راډیو رییس جیمي فلای
ښاغلي جیمي فلای ویلي چې د ازادې اروپا / ازادي راډیو به خپل ایډیټوریال اصول د طالبانو په خوښه بدل نه کړي او زموږ د تجربو له مخې زموږ اورېدونکي به هڅه وکړي چې موږ پیدا کړي او هېڅ څوک د حقیقت ویلو مخه نه شي نیولای.