د اوکراین جنوب د ژاپوریژیا مرکز ته نږدې د ویلنیانسک د یوه روغتون پر زېږون څانګې د روسيې د توغندي د لګېدو له امله یوی نوی زېږېدلی ماشوم وژل شوی دی.
له دې پېښې وروسته د اوکراین ولسمشر ولادیمیر زیلنسکي پر خپلې فېسبوکپاڼه ولیکل، روسیه یوه ترهګر هېواد دی چې وېره او وژنه خپروي.
هغه زیاته کړې، دښمن یو ځل بیا د هغه څه ترلاسه کولو لپاره په ترهګرۍ او وژنو لاس پوری کړی چې په تېرو نهو میاشتو کې یې ترلاسه نه کړل او هیڅکله به یې ترلاسه نه کړي.
د سییمې والي الکساندر ستاروخ شپې ناوخته په ټیلیګرام لیکلي، روسانو د ویلنیانسک روغتون په کوچنۍ زېږون څانګې لوی توغندي وتوغول او یو نوی زېږېدلی ماشوم يې وواژه.
دا برید په داسې حال کې ترسره کېږي چې د اوکراین په خیتځ لوهانسک او دونباس سیمو کې د روسيې او اوکراین سرتېرو ترمنځ جګړې زور اخیستی دی.