ټاکل شوې ده چې یکشنبې په استرالیا کې د کرېکټ د شل اورونو نړیوال جام لوبې پيل شي.
د اوونۍ تر اخره به د لومړي پړاو لوبې په دوو ګروپونو کې ترسره شي، افغان لوبډله د غوراوي په پړاو کې ده چې دا لوبې راتلونکې اوونۍ شروع کېږي.
د شل اورونو د کرېکټ نړیوال جام لومړی ځل په ۲۰۰۷ کال کې پیل شو، کوربه یې جنوبي افریقا وه. تر دې وروسته اووه ځله دا نړیوالې لوبې په بېلابېلو هېوادونو کې ترسره شوې دي.
تر اوسه دا جام دوه ځله ویسټ اینډیز ګټلی دی، له دې پرته هند، پاکستان، انګلستان، سریلانکا او استرالیا یو یو ځل دا جام خپل کړی دی.
د برېتانیایي رسنیو په استناد نژدې شپږ پېړۍ مخکې د کرېکټ لوبې د انګلستان په جنوب ختیځ کې پیل شوې.
دا لوبې بیا د برېتانیا له امپراتورۍ سره خپرې شوې او د نولسمې پېړۍ په پيل کې د کرېکټ د نړیوالې شورا له رامځته کېدو سره یې نړیوالې مسابقې شروع شوې.
د کرېکټ نړیوال جام پخوا یوازې یو ورځنی و چې لومړی ځل په نولس سوه پنځه اویایم کال کې وشو، دا جام هر څلور څلور کاله وروسته ترسره کېږي او راتلونکې لوبې یې په دوه زره درویشتم کې په هند کې دي.
په دې اړه نور: کرېکټ بورډ: د کرېکټ نړيوال شل اوريز جام لپاره مو مالي ملاتړ کوونکی موندلید ټسټ لوبو نړیوال جام هم اوس پیل شوی دی چې تېر کال نیوزیلنډ خپل کړ.
د شل اورونو په لومړیو دوو نړیوالو جامونو کې افغان لوبډله ونه لوبېده له هغه را وروسته یې دې جام ته لار وکړه خو تر دې دمه یې د پام وړ نتیجه نهده ترلاسه کړې.
د افغانستان د کرېکټ بورډ عمومي رئیس میرویس اشرف ازادي راډیو ته وویل، هیلهمند دی چې سږ کال به په نړیوال جام کې افغان لوبډله ښه وځلیږي.
نوموړي وويل: "تیاریانې ښې دي، لوبغاړي جسما هم ښه چمتو شوې دي. په استرالیا کې پنځلس شپاړس ورځې تمرینات چې د قرنطین پر مهال ترسره کېږي ډېر څه دي، چې له دې سره به که خدای کول چمتوالی نور هم ښه شي."
ميرويس اشرف
افغان لوبډله به د دې تیاریو په ترڅ کې د دوشنبې په ورځ له بنګلهدېش او د چهارشنبې په ورځ له پاکستان سره تمریني لوبې وکړي.
په نړیوال جام کې د افغانستان لومړۍ لوبه د غوره پړاو له پيل سره سم په لومړۍ ورځ د اکتوبر په دوه ویشتمه له انګلستان سره ده.
څلور ورځې وروسته تر دې له بلې پياوړې ډلې نیوزیلنډ سره د افغانستان لوبه ده، له افغانستان سره په ګروپ کې کوربه استرالیا هم ده چې د نومبر په څلورمه به مسابقه ورسره وکړي.
دوې نورې هغه لوبډلې به له دې ګروپ سره یو ځای شي چې د لومړي پړاو په سیالیو کې روانه اوونۍ بریالۍ شي.
د لومړي پړاو لوبې په دوو ګروپونو کې ویشل شوې دي، چې په لومړي پړاو کې اته لوبډلې په دوو ګروپونو کې ویشل شوې دي.
په الف ګروپ کې:
- سریلانکا، نامیبیا، متحد عربي امارات او هالنډ
په ب ګروپ کې:
- ویسټ اینډیز، سکاټلنډ، زیمبابوې او ایرلنډ
له دې هر ګروپه به دوه ټیمه د غوره لوبډلو پړاو ته لاره کوي.
له دې هر ګروپه به دوه ټیمه د غوره لوبډلو پړاو ته لاره کوي.
په تېرو پنځلس کلونو کې د شل اووره نړیوال جام لوبې د کورونا وبا او یو شمېر نورو دلایلو له امله په منظم ډول نهدي ترسره شوي، خو تر دې وروسته چې د کرېکټ نړیوالې شورا کوم پلان ورته جوړ کړی دی، د دې جام لوبو مهالوېش یې منظم کړی دی.
ټاکل شوې ده چې دوه کاله وروسته د شل اورونو د کرېکټ نړیوال جام په ویسټ اینډیز او د امریکا په متحد ایالتونو کې ترسره شي له هغه دوه کاله وروسته به هند او سریلانکا د دې جام کوربانه وي.
په دوه زره اته ویشتم کې به په استرالیا او نیوزیلنډ کې دا لوبې وشي او په دوه زره دېرشم کال کې اټکل کېږي چې برېتانیا او ایرلنډ به د شل اورونو د نړیوال جام کوربهتوب وکړي.