د سره صلیب نړیواله کمېټه وايي، ماینونه او ناچاودلې وسیلې د افغانستان خلکو ته جدي خطر پېښوي.
دې کمېټې پرون (پنجشنبې) پر خپله ټویټرپاڼه ولیکل، د سږ کال له جنورۍ څخه په افغانستان کې د ماینونو او ناچاودلو وسیلو د چاودنو له کبله څه باندې ۹۰۰ کسانو ته مرګژوبله اوښتې ده.
د دې کمېټې په وینا د ماینونو او ناچاودلو وسیلو تقریباً نیمایي قربانیان ماشومان دي.
د سره صلیب نړیواله کمېټه د ناچاودو وسیلو پاکول د ټولو د ژوند لپاره ضروري بولي.