د اوکراین ولسمشر ولودیمیر زیلینسکي د اروپايي ټولنې له غړو هېوادونو څخه یوځل بیا غوښتي دي چې د روسیې پر وګړو د ویزې بندیز ولګوي.
د اوکراین ولسمشر ولودیمیر زیلینسکي وايي چې د اروپا ګډ ارزښتونه باید له منځه تلو ته پرې نه ښودل شي.
زیلینسکي پرون په پلازمېنه کییف کې په یوه ویډیويي وینا کې د خبرو پرمهال وویل، داسې نه شي کېدای چې اروپا دې د یوه سوپرمارکېټ په شان وي او دا دې مهمه نه وي چې څوک ورننوځي او څوک ترې وځي.
هغه زیاته کړه: "باید یو ضمانت موجود وي چې د روسیې قاتلان او د مسکو له دولتي تروریزم سره مرسته کوونکي د شینګن له ویزو څخه استفاده ونه کړای شي."
د اروپايي ټولنې ځینو غړو هېوادونو، له هغې ډلې د بالتیک سمندرګي د حوزې درېیو هېوادونو او همداراز چک جمهوریت د روسیې پر وګړو د ویزې او کار په برخو کې یولړ محدویتونه لګولي دي.
چک جمهوریت چې اوسمهال د اروپايي ټولنې دوره یي مشري کوي، د دې ټولنې په ټول قلمرو کې پر روسانو د ویزې د بندیز پلوي دی خو دې هڅو د ټولنې په نورو غړو هېوادونو کې تراوسه د پام وړ نتیجه نه ده ورکړې.
ارشیف: د اوکراین وګړي
د اوکراین ولسمشر همداراز له لاتویا څخه مننه وکړه چې روسیه یې د تروریزم د ملاتړي هېواد په توګه پېژندلی دی.
د روسیې د بهرنیو چارو وزارت کې د شمالي امریکا د څانګې مشر السکاندردارچیف پرون تاس دولتي خبري آژانس ته وویل چې که د امریکا سنا د روسیې د منزوي کولو لپاره کوم طرح وړاندې کړي یا یې د تروریزم د ملاتړي هېواد په توګه اعلان کړي نو د مسکو او واشنګټن ترمنځ ډيپلوماتیک اړیکي به سخته ضربه وویني او حتی ښايي پرې شي.
له بلې خوا مسکو او کییف پرون بیاهم پر یوبل د اوکراین د زاپوریژیا د اټومي بټۍ په شاوخوا کې د جګړې د ګواښونو تورونه ولګول.
ملګروملتونو غوښتنه کړې چې د دې تاسیساتو په شاوخوا کې پوځي فعالیتونه باید بند شي او دا یوه غیرنظامي سیمه اعلان شي.
د زاپوریژیا اټومي تاسیسات پر اوکراین د روسیې له یرغل لنډه موده وروسته د روسیې لاس ته ولوېدل خو اوکرایني انجنیران لاهم د روسیې تر څارنې لاندې هلته کار کوي.
لویدیځو هېوادونو پر مسکو غږ کړی چې خپل ځواکونه د زاپوریژیا له اټومي تاسیساتو څخه وباسي.