د ناروې د کډوالو شورا وایي، د طالبانو د واکمنۍ په یوه کال کې عامو افغانانو د سولې لپاره لویه بیه پرې کړې ده.
دغې شورا نن د طالبانو د یو کلنۍ په مناسبت راپور کې ویلي، افغانستان کې د لوږې کچه ټکان ورکونکې ده او په خبره یې د طالبانو د حکومت او نړیوالو د نه همکارۍ له کبله میلیونونه افغانان ناهیلي شوي دي.
په راپور کې د دغې شورا د افغانستان د مشر نیل ټرنر په حواله راغلي، د طالبانو د حکومت دا دي کال پوره شوه، خو لا هم د افغانستان بهرنۍ شتمني کنګل ده، مرکزي بانک بشپړ فعاله نه دی او د پراختیا ښکاره څرک نه ښکاري.
طالبانو بیا له دې وړاندې ادعا کړې چې دوی د افغانستان اقتصاد له سقوطه ژغورلی او ویلي یي دي چې بانکي چارې هم نژدې عادي حالت ته ګرځېدلي دي.