د ایران ولسمشر پرون په تهران کې د تاجکستان له ولسمشر سره په کتنه کې وویل چې په افغانستان کې د تروریستانو حضور د اندېښنې وړ دی.
ابراهیم رييسې چې له امام علي رحمان سره له کتنې وروسته په یوه خبري غونډه کې خبرې کولې، وویل چې د دوی ګډ نظر دا دی چې په افغانستان کې دې سوله، امنیت او ثبات ټینګ شي.
ده په عین حال کې وویل چې دواړه هېوادونه په افغانستان کې د تروریستانو حضور نه شي منلی.
ایران په افغانستان کې د داعش ډلې د فعالیتونو پر زیاتېدو اندېښنه لري.