په پاکستان کې یوې محکمې هغه شپږ تنه په اعدام محکوم کړل چې د یوې سریلانکایي کارخونې مدیر یې د کفر په تور په ډله ییزه توګه وژلی و.
د ګوجرانوالا ښار د یوې محکمې قاضي په دې اړه حکم د بندو دروازو ترشا واوروو او د پریکړې جزیات موظف څارنوال ندیم سرور شریک کړي دي.
د سرور په وینا قضیه کې ښکېلو ۹ نورو کسانو ته د ابدي حبس او ۷۲ کسانو ته د دوه-دوه کاله بند سزا اورول شوې ده.
د سریلانکا د نساجي فابریکې پر مدیر پریانتا کومارا تېر دسمبر کې سیال کوټ ښار کې برید وشو.
شاوخوا سلو کسانو کومارا دین ته د سپکاوي په تور په وهلو ډبولو تر مرګه ورساوه او بیا یې د هغه جسد ته اور واچوه.
دوی کومارا تورن کړی و چې هغه کاغذ یې څېرې او سوځولی چې د قران شریف ایتونه پرې لیکل شوي وو.