د اوکراین ولسمشر وايي د روسیې تهاجم یوازې پر اوکراین محدود نهدی، بلکې د ده په وینا هدف ټوله اروپا ده.
ولادیمیر زلنسکي پرون ناوخته په خپله وینا کې له لوېدیځ څخه غوښتنه وکړه چې د روسیې د انرژۍ پر تولیداتو بشپړ بندیز ولګوي.
هغه یو وار بیا غوښتنه وکړه چې اوکراین ته دې نورې وسلې هم ورکړل شي.
په همدې حال کې اوکراین ویلي چې د اوکراین په ختیځ کې د راغونډو شویو روسي ځواکونو په وړاندې سختې جګړې ته چمتووالی لري.
د اوکراین پوځ وايي روسیه هڅه کوي د اوکراین په ختیځ کې له کریمیا سیمې چې روسیې په ۲۰۱۴م کال کې له خپلې خاورې سره الحاق کړه او په ختیځ کې له دونباس سیمې ځمکنی دهلېز پرانیزي.
د دونباس پر ځینو برخو روسپلوه بېلتون غوښتونکي کنټرول لري.