د اوکراین مرکچي پلاوی له روسیې سره د خبرو په هدف د بلاروس سرحد ته ورسېد.
د اوکراین ولسمشرۍ ماڼۍ ویلي چې په مرکچي پلاوي کې یې د دفاع وزیر اولیکسي ریزنیکوف، د ولسمشر سلاکار میخایلو پودولیاک او یوشمېر نور چارواکي شامل دي.
د اوکراین ولسمشر ولادمیر زلنسکي خبرداری ورکړی چې راتلونکي ۲۴ ساعته به د اوکراین لپاره حساس وي.
نن هم له پلازمېنې کیف او بل لوی ښار خارکیف نه د چاودنو راپورونه ورکول شوي دي.
دا په داسې حال کې ده چې مسکو پر اوکراین د بې دلیله یرغل له کبله د لویدیځو قدرتونو له سختو اقتصادي بندیزونو سره مخامخ دی.