د طالبانو حکومت د کرنې او مالدارۍ وزارت په کاپیسا کې د کبانو د روزنې په زیاتېدو ټینګار کوي.
د دې وزارت له لوري په خپره شوې خبرپاڼه کې راغلي دي چې د کرنې وزارت سرپرست مولوي عبدالرحمان تېره ورځ کاپیسا ولایت ته سفر کړی او هلته يې د یوې غونډې پر مهال ټینګار وکړ چې د کاپیسا پریمانه اوبو او ښې هوا ته په کتو باید په دې ولایت کې د کبانو د روزنې فارمونه زیات شي.
د کرنې وزارت په خبرپاڼه کې ژمنه شوې چې په کاپیسا کې به د کبانو د روزنې لوی فارمونه جوړ شي او کرنیز خدمتونو ته به پراختیا ورکړل شي.
په کاپیسا کې اوس مهال د کبانو د تولید او روزنې ۲۶ فارمونه شته چې تېرکال يې ۱۵ ټنه کبان تولید کړي وو.