متحده عرب امارات وايي چې په یمن کې یې د ایران له ملاتړه د برخمنو حوثي یاغیانو له خوا توغول شوی بالیستیک میزایل ویجاړ کړی دی.
دا د سعودي عربستان په مشرۍ د ائتلاف د غړو هېوادونو په وړاندې د توغندیو د توغولو د لړۍ وروستۍ پېښه ده.
دغه ائتلاف له کلنو راهیسې د حوثي یاغیانو پر خلاف جنګېږي.
د اماراتو دفاع وزارت نن دوشنبه وویل چې په پېښه کې چا ته مرګ ژوبله نه ده اوښتې او د توغندي ټوټې پر داسې ساحه لوېدلي چې خلک په کې نه اوسي.
دا پېښه داسې مهال کېږي چې د اسرائیل ولسمشر اسحاق هرځوګ متحده عرب اماراتو ته خپل تاریخي سفر پیل کړ، چې د دغه هېواد له مشرانو سره پر ځینو مسایلو خبرې وکړي.
هرځوک ویلي چې له دې پېښې سره- سره به خپل سفر ته دوام ورکوي.
تر دې پېښې لنډه شېبه مخکې د حوثي یاغیانو د پوځ ویاند د جزئیاتو له ورکولو پرته په ټویټر کې ولیکل چې دوی به په څو ساعتونو کې په متحده عرب اماراتو کې دننه د نویو پوځي عملیاتو په اړه جزئیات خپاره کړي.