د ناټو سرمنشي ینس سټولټنبرګ د مسکو پر طبیعي ګازو د اروپا د اتکا په اړه اندېښنه څرګنده کړې ده.
هغه پرون وویل چې د ناټو پوځي تړون د ۳۰ غړوهېوادونو ترمنځ د انرژۍ د تمویل د بېلابېلو لارو د موندلو پر اړتیا موافقه شوې ده.
اروپايي ټولنه د طبیعي ګازو یو – درېیمه برخه له روسیې ترلاسه کوي.
د ژمي په سړه هوا کې د طبيعي ګازو کمښت اروپايي واردونکي هم په غوسه کړي دي.
د اروپا د ګازو د تامین په تړاو اندېښنې وروسته له هغه زیاتې شوې چې د روسیې څه باندې یو لک پوځیان او پوځي تجهیزات د اوکراین پولې ته څېرمه ځای پر ځای شول.
اندېښنې شته چې د اوکرایین روسیې په کړکیچ کې روسیه ښایي د ګازو د صادراتو له امکاناتو د فشار په توګه کار واخلي.