په پام کې ده هند، ډېر ژر په افغانستان کې له اړو کسانو د مرستې لپاره په زیاته پیمانه غنم ولېږي.
د هندي رسنیو د راپورونو له مخې دغه بشري مرستې به د پاکستان له طریقه افغانستان ته انتقالېږي.
اسلام اباد ویلي چې د نوي ډیلي د دې نوښت هرکلی کوي.
راپورونه وايي، دا مهال هندي او پاکستاني چارواکي افغانستان ته د بشري مرستو د رسولو په اړه په خبرو بوخت دي.
هند پرون جمعه (د مرغومي ۱۷مه) هم افغانستان ته شااوخوا ۶ ټُنه طبي مواد ولېږدول.
د هند د بهرنیو چارو وزارت په یوه اعلامیه کې وویل، د دغو مرستو ۲ ټُنه یې دارو درمل دي چې په کابل کې د اندراګاندي روغتون ته وسپارل شول.