د افغان ښځو، نجونو او بشري حقونو لپاره د امریکا ځانګړې استازې رینا امیري وايي د افغان ښځو او ماشومانو په ستونزو ډېره ښه پوهېږي.
هغې دا خبره نن په یوه ټویټ کړې ده.
امیري ویلي: "د یوې ښځې او یوې مور په صفت، زه ډېره ښه پوهېږم چې ښځې او د هغوی ماشومان په افغانستان کې د بشري ناورین دروند بار زغمي."
امیري دا ټویټ د یوه پیغام په ځواب کې چې د افغان مېرمنو په استازیتوب دې ته په خطاب لیکل شوی کړی دی.
په هغه پیغام کې چې په خپله مېرمن امیري هم خپور کړی د افغان ښځو په استازیتوب راغلي: "موږ هرو مرو خپل حقونه غواړو، خو تر هغه مخکې مو ماشومانو ته خواړه غواړو."
افغانيالاصله امریکايۍ رینا امیري وړمه ورځ د افغان ښځو، نجونو او بشري حقونو لپاره د امریکا د ځانګړې استازې په توګه وټاکل شوه.
هغې د دې دندې له ترلاسه کولو وروسته په خپل لومړي پیغام کې هم ویلي و چې د افغانستان د ښځو او زیانګالو وګړو د ژوند د ناوړه وضعیت د بهبود لپاره به په خپل ټول توان هڅه وکړي.