د افغانستان برښنا شرکت وایي، دوی به له ازبکستان سره هم د برېښنا د واردولو تړونونه لاسلیک کړي.
د دغه شرکت د مشرتابه پلاوی په تاشکند کې دی او په دې اړه له ازبکستاني چارواکو سره په خبرو بوخت دی.
پرون دغه پلاوي د تاجکستان له برق تاجک شرکت سره د ۲۰۲۲م کال د برېښنا د واردولو قرارداد لاسليک کړ.
افغانستان د اړتیا وړ خپله برېښنا تر ډېره د منځنۍ اسیا له همدې دوو هېوادونو واردوي.
د اګسټ له ۱۵مې راهیسې چې طالبان په افغانستان کې بیا واک ته رسېدلي دا هېواد د تاجکستان په ګډون د برېښنا له واردوونکو هېوادونو په لسګونه ملیون ډالرو پوروړی دی.