د افغانستان لپاره د ملګرو ملتونو ځانګړې استازې له افغانانو سره د بشري او اقتصادي مرستو د دوام خبر ورکړی دی.
دیبورا لاینز پرون په کابل کې د طالبانو د رئیسالوزرا له مرستیال عبدالسلام حنفي سره کتلي او دا ډاډ یې هم ورکړی چې د بانکي ستونزو د حل په برخه کې به د طالبانو له حکومت سره همکاري کوي.
د مېرمن لاینز او ښاغلي حنفي د پروني ملاقات خبر طالبانو په یوه خبرپاڼه کې ورکړی دی.
خبرپاڼه کې راغلي چې دیبورا لاینز طالب چارواکو ته په افغانستان کې د خپلو فعالیتونو او امریکا ته د خپل راتلونکي سفر په اړه معلومات ورکړي دي.
د خبرپاڼې له مخې، د طالبانو مرستیال هم ویلي چې دوی له نړیوالې ټولنې په ځانګړي ډول ملګرو ملتونو سره تفاهم او همکارۍ ته ژمن دي.