په ننګرهار کې ځینو سرچینو محلي خبریالانو ته ویلي چې طالبانو په دغه ولایت کې درې کسان له اسلامي دولت ډلې یا داعش سره د ارتباط په تور اعدام کړي دي.
دوه مړي په مرکز جلالاباد کې ځړول شوي وو او درېیم تن په چپرهار ولسوالۍ کې.
دولتي اژانس باختر هم په داعش پورې د درېیو تړلو کسانو د مړینې خبر ورکړی دی.
طالبانو تېره اوونۍ په هرات ولایت کې د څلورو کسانو مړي، د ښار په بېلابېلو برخو کې ځړولي وو.
دوی ویلي وو، دغو کسانو د یوه سوداګر او د هغه د زوی په تښتونه کې لاس درلود چې د تښتول شویو د خوشې کېدو په عملیاتو کې څلور واړه ووژل شول او یو طالب ټپي شو.
بلخوا راپورونه وايي، په ننګرهار ولایت کې د درېیو کسانو مړي پیدا شوي دي.
په ننګرهار کې د طالبانو د حکومت یوه ولایتي ویاند نن د جرمني خبري اژانس ته دا خبر تأیید کړی او ویلي یې دي، نهپوهېږي په دې وژنو کې څوک لاس لري.
پرون په جلالاباد کې د یوه پخواني خبریال سید معروف سادات په ګډون په ډزو د څلورو کسانو د وژل کېدو راپور ورکړل شوی و.