روسیې او بلاروس د ناټو تړون د غړو هېوادونو له پولو سره پراخ پوځي تمرینات پیل کړل.
له لوېدیځ سره د ترینګلو اړیکو په ترڅ کې مسکو او مېنسک ژمنه کړې چې په خپلو کې به اړیکې پیاوړې کوي.
د روسیې دفاع وزارت وویل، د زاپاد په نوم دغه پوځي تمرینات چې یوه اوونۍ به دوام کوي، نن پیل شوي.
دغه تمرینونه په بلاروس، د روسیې په لوېدیځ او تور سمندرګي کې ترسره کېږي.
مسکو ویلي چې په دغو پوځي تمرینونو کې ۲۰۰ زره سرتېري، شااوخوا ۸۹ هلیکپټرې او الوتکې، ۲۹۰ ټانکونه او ۱۵ کښتۍ برخه لري.
دا په اروپا کې په څو لسیزو کې تر ټولو پراخ پوځي تمرینونه بلل شوي چې ناټو پرې اندېښنه ښودلې.
ناټو ویلي، کرملېن څارونکو ته چې د نړیوال توافق له مخې یې باید ورغوښتی وی، بلنه نهده ورکړې.