د کابل په نړیوال هوايي ډګر کې د پنجشنبې د ماښام د چاودنې د مړو شمېر له ۱۷۰ کسانو واوښت.
'سي.اېن.اېن' او 'سي.بي.اېس' ټلوېزیوني چینلونو د افغانستان د روغتیا وزارت د سرچینو په حواله راپور ورکړی چې وايي، نوي شمېرې د پخوانیو هغو پرتله چې سل تنه ښودل شوي وو، په ډېر توپیر سره لوړ دي.
د 'سي بي. اېس' خبریال همدا راز راپور ورکړی چې لږ تر لږه ۲۰۰ نور کسان په دې چاودنه کې ټپیان شوي دي.
د بریټانیا د بهرنیو چارو وزیر ډومنینک راب پرون جمعه (د وږې په ۵مه) په یوه بیان کې وویل، دا لویه تراژیدي ده ځکه دا بې ګناه خلک د خپلو کورنیو د ژغورنې لپاره هلته تللي وو، خو په یوه بې رحمانه حمله کې ووژل شول.
د دې حملې مسوولیت اسلامي دولت ډلې یا داعش منلی دی.