د شانګهای د همکارۍ سازمان په چوکاټ کې د افغانستان د تماس ډلې څلورمه ناسته نن سې شنبه(د چنګاښ ۲۲مه) په تاجکستان کې پیلېږي.
د افغانستان د بهرنیو چارو وزیر محمد حنیف اتمر په دې دوه ورځنۍ غونډه کې ګډون لري.
د بهرنیو چارو وزارت یوه ویاند حامد تهذیب پرون دوشنبه(د چنګاښ ۲۱مه) ماښام ازادي راډیو ته وویل:
"په شانګهای سازمان کې د افغانستان د بشپړ غړیتوب مساله، له ترهګرۍ او تُندلارۍ سره د مبارزې برخه کې له افغانستان سره د شانګهای سازمان همکاري، د افغانستان اوسنۍ وضعه او د سیمې په سوکالۍ باندې یې پر اغېزو بحث د دغه سفر هدفونه دي."
د تاجکستان پلازمېنه دوشنبه ښار داسې وخت د شانګهای سازمان په چوکاټ کې د افغانستان د تماس ډلې د ناستې کوربه دی چې د تاجکستان ولسمشر امام علي رحمان له افغانستان سره د پولې په اوږدو کې د شلو زرو سرتیرو د ځای پر ځای کولو امر کړی دی.
د افغانستان په بېلابېلو سیمو په تېره بیا شمالي ولایتونو کې د جګړو زیاتېدو د منځنۍ اسیا هېوادونه اندېښمن کړي دي.