افغانستان،یمن، سومالیا، د سوریې او کانګو جمهوریتونه هغه هېوادونه بلل شوي چې په کې تر نورو هېوادونو زیات له ماشومانو سره تاوتریخوالی شوی دی.
دا خبره د ملګرو ملتونو د سرمنشي په یوه راپور کې یاده شوې چې پرون دوشنبه (د چنګاښ ۷مه) پرې د امنیت شورا غړو بحث وکړ.
په جګړو کې د ماشومانو د وضعیت په اړه دې ځانګړې غونډې ته د ملګرو ملتونو سرمنشي انتونتي ګوتیرش وویل: "۲۰۲۰ میلادي کال کې له ۱۹۳۰۰ ماشومانو سره د سخت تاوتریخوالي ۲۴۰۰۰ پېښې د دې منډېټ په ۲۱ برخو یا ډولونو سره شوي. د جګړو او ګډوډیو په وخت د ماشومانو حقونو ته نه درناوی ټکان ورکوونکی او زړه ماتوونکی دی."
د ملګرو ملتونو سرمنشي انتونتي ګوتیرش
د ماشومانو جنسي ځورونه، تیری، وهل، وژل، ربړول، د بدن د غړو غوڅول، یرغمل او تښتونه او په ښوونځیو بریدونه د تاوتریخوالي هغه شدید ډولونه یاد شوي چې د ملګرو ملتونو په پرونیو بحثونو کې یاد شول.
د ملګرو ملتونو سرمنشي له امنیت شورا او ټولو غړو هېوادونو وغوښتل چې د ماشومانو د خوندي ساتلو لپاره جدي اقدامات وکړي.