د کابل په لویدیځ کې د هدفي وژنو په اړه پر ټویټر اعتراضونه! د دغې ټولنیزې رسنۍ ډېری افغان کاروونکو 'د هزارګانو نسل وژنه بنده کړئ' هشټک په کارولو غوښتنه کړې چې دغه حملې د هزارګانو د نسل وژنې په توګه په رسمیت وپېژندل شي او مخه یې ونیول شي.
د سیاسي چارو فعال اصف اشنا چې د اعتراض کوونکو له ډلې دی وایي، په ټوله نړۍ کې یو شمېر اعتراض کوونکي چې افغانان دي، دغه ۲۴ ساعته لړۍ پیل کړې ده.
ښاغلي اشنا زیاته کړه: "پر ټویټر د دغه انټرنیټي عدالت غوښتنې هدف د هدفي وژنو په رسمیت پېژندل دي چې له څو کلونو راپه دېخوا د هزاره ګانو پر وړاندې روان دي، دغه وژنې د جینوسایډ کنوانسیون او د جینوسایډ د کنوانسیون دویمې مادې ته په کتو چې د جینو سایډ جرم تعریفوي، د دغو حمله هره یوه یې د نسل وژنې ښکاره بېلګې دي."
د ښاغلي اشنا په خبره، د اعتراضونو دا ټویټري لړۍ د افغانستان او نړۍ په کچه د 'نسل وژنې' د مخنیوي په هدف پیل شوې ده.
د #StopHazaraGenocide ټویټري هشټک د شنبې (د غبرګولي ۱۵مه) په ورځ په افغانستان کې 'ټرېنډ' شو.
On May 22, 2021, we gathered together in Boston to commemorate the memories of the victims of Sayed ul Shuhada high school, share our solidarity with their families, and to ask the world & the Afghan government to #StopHazaraGenocidePlease read the following statement for more: pic.twitter.com/UXftS65JY1
— Jumakhan Rahyab (@jumakhanrahyab) June 4, 2021
له دې سره هم مهاله، د امریکا په ځینو لویو ښارونو کې هم یو شمېر افغانانو په دې اړه په اعتراضونو لاس پورې کړی دی.
د دغو اعتراضونو یو تنظیموونکي داوود وصل ازادي راډیو ته وویل: "په افغانستان کې د هزاره ګانو د نسل وژنې په اړه، نن ټاکل شوې چې د سیمه ییز وخت پر مهال دوه بجې د امریکا د بېلابېلو ایالاتونو لکه واشنګټن ډي سي، کلیفورنیا، فینکس، اریزونا او ځینو نورو ځایونو کې دغه اعتراضونه پیل شي،سلګونه امریکا مېشتي هزارګان به په کې ګډون وکړي."
د افغان حکومت ویاندویانو په دې اړه چې اعتراض کوونکو دغه حملې 'د هزاره ګانو نسل وژنه' بولي، د نظر له ورکولو ډډه وکړه، خو ویلي یې دي چې د کابل د لویدیځ امنیتي طرحه د ولسمشر محمد اشرف غني او د هغه د دویم مرستیال سرور دانش له لوري جوړه شوې ده.
د ملي امنیت شورا دفتر ویاند رحمت الله اندړ وویل چې دغه طرحه په دې شورا کې تر څېړنو لاندې ده:
"د کابل د لویدیځ امنیتي طرحه چې ملي امنیت شورا ته سپارل شوې، تر کار لاندې ده، له تخنیکي او مسلکي څېړنو وروسته به ولسمشر ته وړاندې شي."
رحمتالله اندر سخنگوی شورای امنیت ملی
دا اعتراضونه د ثور په ۱۸مه نېټه د کابل په لویدیځ کې د سید الشهدا په نوم د نجونو پر ښوونځي د هغې خونړۍ حملې په تړاو دي چې په کې سل کسان ووژل شول.
د دغې حملې له قربانیانو سره د مرستندویه بنستونو له خوا مرستې هم وشوې.
د کابل په لویدیځ کې مخکې له دې هم ورته خونړۍ حملې شوې دي.
خو دا یوازې د کابل لوېدیځ نه دی چې په کې انتحاري او موتر بم حملې کېږي، بلکې مخکې د افغانستان د پلازمېنې کابل او ولایتونو په نورو سیمو کې هم ورته حملې شوي چې د هر قوم کسان په کې وژل شوي دي .
څه موده وړاندې د لوګر ولایت په مرکز پل علم کې په یو موټر بم برید کې ۲۵کسان ووژل شول او تر ټولو وروستۍ حمله کې بیا تېره ورځ د هلمند ولایت نهر سراج ولسوالۍ کې د هوایي حملې له امله ګڼو ملکیانو ته مرګ ژوبله واوښته.