کاپیسا کې له تېرې شپې تردې دمه د طالبانو او امنیتي ځواکونو ترمنځ نښته روانه ده.
په کاپیسا کې پولیسو نن شنبه سهار (د غبرګولي په ۱) ازادي راډیو ته وویل طالبانو تېره شپه د تګاب ولسوالي د شاتوري په سیمه کې پر امنیتي ځواکونو بریدونه پیل کړي دي چې جګړې لا هم ادامه لري.
د کاپیسا د پولیسو ویاند شایق شورش وایي تراوسه د دې جګړو پر مهال د پاڅون کوونکو دوه تنه وژل شوي او څلور تنه یې ټپیان شوي دي.
ښاغلي شورش زیاته کړه چې د طالبانو بیا دوه تنه وژل شوي او اووه تنه یې ټپیان شوي دي.
د پولیسو په وینا طالبان مجبوره شوي دي چې په شا شي، خو طالبانو تر اوسه د دې جګړې په اړه څه نه دي ویلي.