د افغانستان عامې روغتیا وزارت ویلي چې د کرونا ویروس د درېیمې څپې د خپرېدو د مخنیوي لپاره په ځینو محدودیتونو غور کوي.
د دغه وزارت سرپرست وحید مجروح نن یوې غونډې ته ویلي چې له ایران او پاکستان سره په ګډه پوله پر تګ راتګ محدودیتونه، د هند د پروازونو ځنډول، د شپې ګرځبندیز، پر غونډو باندې بندیز او د عاجلو مرستو د کمېټو فعالول په دې پلانونو کې شامل دي.
ده زیاته کړې ژر دا وړاندیزونه د دولت له مشرتابه او امنیت شورا سره شریکوي څو هغوی یې په اړه پرېکړه وکړي.
په افغانستان کې دا څو وروستۍ ورځې د کرونا د مثبتو پېښو د زیاتوالي راپورونه ورکړل شوي.
اوس وخت په افغانستان کې د کرونا مثبتې پېښې له ۵۹ زرو پورته تللي او د مړو شمېره هم ۲،۵۹۲ ته رسېدلی دی.