ایران وایي، په اروپا کې د راتلونکو خبرو پر مهال به اټمي موافقې ته د امریکا په بېرته ستنېدو خبرې ونهشي.
ټاکل شوې دغه خبرې دوه ورځې وروسته د اتریش په پلازمېنه ویانا کې ترسره شي.
د ایران د بهرنیو چارو مرستیال وزیر عباس عراقچي نن هغه راپورونه رد کړل چې ګواکې ایران به دې غونډه کې په نامستقیم ډول له امریکا وغواړي چې د ۲۰۱۵ کال اټمي تړون ته وګرځي.
ټاکل شوې د بریتانیا، چین، فرانسې، جرمني، روسیې او ایران ډيپلوماتان د اپرېل په شپږمه په دې اړه خبرې وکړي.
د نړۍ دغه هېوادونه لا هم له ایران سره پر اټمي تړون ولاړ دي.
د امریکا ولسمشر جو بایډن ویلي، دوی دغه تړون ته ورګرځي، خو ټینګار یې کړی چې ایران باید دې برخه کې ګام پورته کړي.